GIPAHIBALO sa Cagayan de Oro City Disaster Risk Reduction and Management Department (CDO-CDRRMD) ang publiko nga mahimo na nilang ipadangat pinaagi sa cellphones ang libreng emergency calls ngadto sa 911.
Sa gipagulang advisory sa CDRRMD, mahimong ma-access ang 911 gamit ang Globe, TM, SMART ug TnT networks, ug lakip usab matawagan ang buhatan sa Bureau of Fire ug Police.
Kini human opisyal nga nadawat sa CDRRMD ang Notice of Activation sa Go-Live Status sa Local Call Center sa Oro Rescue niadtong nakalabay nga bulan gikan sa Department of the Interior and Local Government (DILG) Emergency 911 National Office.
Nasayran nga ang Cagayan de Oro ang pinakaunang syudad nga naka-establisar og Rescue 911 sa wala pa gilagdaan ni kanhi Presidente Rodrigo Duterte ang Executive Order No. 56 nga nagmando sa pagmugna og Local Emergency 911 Hotline ubos sa National Call Center ug kontrolado sa DILG niadtong Mayo 25, 2018. (CIO)