Isip bag-o kaniya ang Executive position sa Local nga Pangagamhanan sa Misamis Oriental, mapaubsanong mihangyo si bag-ong pungko Governor Peter M. Unabia (GPMU) ngadto sa mga ulo sa departamento kauban ang mga empleyado nga duyogan siya sa tanang lakang aron hingpit mapadayon ang epektibo ug malungtaron nga paghatud sa nag-unang serbisyo hangtud sa pinakahilit nga lugar sa lalawigan.
Gihimo ni Gov. Unabia ang pangalyupo atol sa iyang inaugural speech niadtong Huebes, Hunyo 30, 2022, sulod sa iyang himuong opisina sa kapitolyo uban sa pagpahibalo nga kinahanglan magpasulabi gayud ang “good governance” sa iyang administrasyon.
“Tabangi ko. Duna koy kahibalo, but kulang pa. Apan anaa man kamo, nagtuo ko nga mahimo nato ang tanan. Kanya-kanya man kita og asset, maoy atong gamiton. If we have the conviction and commitment and the heart, I think we will be effective in our own ways,” sulti sa bag-ong Gobernador.
Daku usab nga pagsaludo ni Gov. Unabia ngadto kang outgoing Governor ug karon Misamis Oriental 2nd District Congressman Bambi Emano sa katarong ug kaligdong sa iyang pagpamunuan sulod sa siyam (9) ka tuig.
(Source: Misamis Oriental Provincial Information Office Facebook page)