Trenta y siete (37) ka mga miyembro gikan sa upat ka Homeowner’s Association (HOAs) ang nakadawat og titulo sa ilang yuta sa pagpangulo sa Social Housing Finance Corporation (SHFC) uban sa lokal nga kagamhanan ning syudad pinaagi sa City Housing & Urban Development Department (CHUDD) Miyerkules, Agosto 31.
Kini nga mga HOAs mao ang Carmen Paglaum Settlers Homeowners Association, Inc. sa Brgy. Carmen (22 titles); Progressive Village Homeowners Association, Inc. sa Brgy. Patag (6 titles); Zone 3 Bugo Homeowners Association Inc. sa Brgy. Bugo (5 titles), ug 6th Division Landless Village Homeowners Association, Inc. (4 titles).
Ang kalihokan nga gipahigayon sa city hall quadrangle nunot sa kasaulogan sa Community Mortgage Program (CMP) diin gitambongan ni Kagawad Edgar Cabanlas, chairman sa committee on urban poor; City Administrator Atty. Roy Raagas; ug SHFC Officer-in-Charge Manager Janet T. Lumayag.
Alayon niini, gipahalipayan ni Kag. Cabanlas ang mga benepisyaryo ilabina ang mga opisyales sa HOA nga naningkamot aron magkahiusa ug magmalampuson ang ilang asosasyon alang sa kaayohan sa tanan.
Samtang gipasalamatan usab ni Atty. Raagas ang mga kadagkuan sa SHFC sa suporta ug tabang nga gihatag ngadto sa mga HOAs, ingon man sa housing program sa syudad ubos sa administrasyon ni Mayor Rolando `Klarex’ Uy.
Gipasalig ni Kag. Cabanlas ug Atty. Raagas nga magpadayon ang housing program sa syudad ug lauman nga daghan pang informal settler families (ISFs) ang makabaton og desenting pinuy-anan.
Ang Community Mortgage Program (CMP) mao ang mortgage financing program sa SHFC nga moabag sa kabus nga HOAs pero legal nga namugna ug tabangan sila nga mapalit ang yuta nga ilang gi-okupar o kaha sa asa nila gusto nga luna pinaagi sa pagpahulam og kwarta.
(Source: CIO-Cagayan de Oro City)