Sangko sa langit ang pagmahay sa usa ka anak ngadto sa iyang amahan nga siya ang gihimong tigpamaligya, tig repacked ug tig transact ngadto sa mga parokyano sa gituohang shabu sa may Zone 1 sitio Nabulod Barangay Baluarte Tagoloan Misamis Oriental.
Igo na lamang sa paghilak si Jhon, 22 anyos, adunay kaipon ug taga Poblacion Tagoloan apan nag abang ug usa ka boarding house sa may sitio Nabulod Baluarte sa nasangpit gihapon nga lungsod, kay kini positibong napalitan sa gituohang shabu sa mga operatiba sa kapulisan sa Tagoloan Municipal Police Station atol sa gipahigayon nga buybust operation sa pagpangulo ni PCAPT Enrique F Dungog, Pebrero 23, 2023, adlawng Huwebes.
Gibasol ni Jhon ang iyang papa, nga maoy nagtukmod kaniya nga mamaligya ug shabu, kay siya napud mismo ang gabuhi sa iyang lima ka mga manghod human sa panagbulag sa iyang amahan ug inahan walo na katuig ang milabay.
Gibiyaan sila sa ilang inahan ug miadto sa Manila ug nadakpan pud ang ilang amahan sa kaso gihapon sa droga mao nga si John ang mibarog isip ginikanan sa iyang mga igsoon. Misamot pa kuno ka salbahis iyang papa human kini makalaya gikan sa presohan ug mibalik gihapon sa iyang dating gawi sa ilegal nga droga ug gihimo siyang tigpamaligya, tig repacked ug tig transact sa shabu ngadto sa mga parokyano.
Napugos nalang si Jhon ug tuman sa sugo sa iyang papa kay ang iyang commission sa pagpamaligya sa droga mao iyang ipalit ug bugas ug kunsumo para sa iyang mga igsoon ug iya nalang kining giantos bisan kahibalo siya nga anytime pwede siya madakpan sa kapulisan.
Sa pinaka latest nga balita, nadakpan pud sa mga operatiba sa Salay Municipal Police Station ang papa ni Jhon kaganihang buntag, ug matud pa ni Jhon wala siya masayod kung unsa iyang maistorya ug masukmat sa iyang papa kung sila magkita sa provincial jail.
Sa pagka karon anaa na naka kustodiya si Jhon sa Tagoloan Municipal Police Station ug giandam na ang kasong paglapas sa RA 9165 kun Comprehensive Dangerous Drug Act of 2002 batok kaniya. (Cheleste Simene, photo courtesy by Cyril Cambalon Jr.)