Dead on arrival sa balay tambalanan ang 2 ka menor de edad ug laing hamtong human mabangga ang gisakyan niining motorsiklo sa usa ka sakyanan Sabado sa gabii bandang alas 11:45 sa may Purok 4, Punta Santiago, Talisayan Misamis Oriental.
Naila ang mga menor de edad nga biktima nga sila si Anabel Babayson, Babae, 15 anyos ug Riza Mae Golosino alias “Bebeng”, babae, 16 anyos, pulos lumulupyo sa Brgy. Pangpangon, Talisayan Misamis Oriental.
Samtang ang nagmaneho sa ilang gisakyang motor nga way plate number mao si Alejandro Sevilla Gica Jr. taga Tup-on, Medina Misamis Oriental.
Ang driver sa nabangga niining sakyanan naila nga si Rixell Carangcang Torayno, 42 anyos, taga San Miguel Village, Lapasan ning syudad, ug sakop sa Cagayan de Oro City Police Office (COCPO).
Nagmaneho kini sa sakyanang Montero nga nagtangag ug plaka nga LAD 1972.
Sigun sa usa sa mga miresponde nga si Jill Tion, membro sa Municipal Disaster Risk Reduction and Management Office (MDRRMO) nga nagkasugat ang motor sa mga biktima ug ang montero diin nalagpot ang mga sakay sa motor ug nakahiagom kini ug pagkabali bali sa kalawasan hinungdan sa ilang hinanaling kamatayon.
Dugang pa nga base sa initial nga imbestigasyon, lango sa ilimnong makahubog ang driver sa motorsiklo, ug gidudahang nipalit ug ice ang mga biktima tungod sa nakita nga ice sa lugar sa aksidente.
Sa pagkakaron, anaa na kustodiya sa Talisayan Municipal Station ang driver sa Montero samtang gipahiluna na ang mga lawas sa 3 ka mga biktima.
(News & photo courtesy by Cheleste Simene)