Subay sa ika-47 nga anibersaryo sa PAG-ASA Youth Association of the Philippines Incorporated (PYAP) sa Misamis Oriental, nagpaabot kini og tabang alang sa mga kabatan-onan isip pag-abag niining kasamtangang panahon sa pandemya.
Kahinumduman nga sa wala pa miabot ang pandemya, ang maong organisasyon nagaselebrar matag tuig sa hawanan sa Kapitolyo Probinsyal ug magapahigayon og programa kung asa imbitado ang tanang Out-of -School youth sa tibuok lalawigan alang sa kasaulogan sa maong anibersaryo.
Gikan sa Oktubre 7 hangtud 15 ning tuig 2021, ang Panggamhanang Lokal sa Misamis Oriental pinaagi sa Provincial Social Welfare and Development Office (PSWDO) nga gidumalahan ni Mr. Jhunleymar Abella sa pakigtimbayayong sa PYAP nagtunol og 1,800 ka mga food packs sa mga lungsod ug syudad sa lalawigan.
Kini gilangkoban sa 3 ka kilo nga bugas, 4 ka de-latang pagkaon ug 10 ka sachet sa instant coffee alang sa tanang mga Out-of-School Youth (OSY) sa lalawigan.
Gipasiugdahan kini ni Ms. Macier Lyn C. Vidaure gikan sa buhatan sa PSWD kung asa nagsilbi kini isip Program in-charge sa Out-of-School Youth Division.
Dugang niini, ang maong programa gipasiugdahan sab ni PYAP-Misor President Mr. North P. Maceda nga maoy nanguna sa pagbuhat og inisyatiba isip pag-adaptar sa bag-ong normal kung asa mas gipili nga mangtunol og food assistance inay ang pagtapok alang sa pagsaulog.
Malampuson nang natunol ang maong food packs sa 1,800 ka mga benepisyaryo gikan sa mga munisipyo sa Lugait, Manticao, Naawan, Libertad, Laguindingan, Claveria, Medina, Talisayan, Balingoan, Binuangan, Salay, Lagonglong, Jasaan, Villanueva, Tagoloan, Alubijid, Opol ug dakbayan sa El Salvador.
Dako ang kalipay sa mga kabatan-onan nga midawat sa maong ayuda gikan sa panggamhanan tungod kay nabati nila ang kainiton sa paghigugma sa amahan sa lalawigan sa tanang ginsakupan niini.
Dako ang pagtoo ni Gobernador Bambi Emano nga ang pagtinabanga dako og papel niining kasamtangang panahon sa pandemya kung asa usa sa mga prayoridad sa pamunoan niini nga mahatagan og ayuda ang matag usa uban sa paglaom nga mobalik sa normal ang tanan.
(News and photo courtesy by Jane Salimbao | Misamis Oriental Provincial Information Office Facebook page)Â