Nag-abiso karon ang Provincial Disaster Risk Reduction and Management Office sa probinsya sa Sarangani ilalum sa Sulong Kaligtasan program ni Governor Steve Chiongbian Solon, nga magbinantayon sa gihapon tungod sa LPA kon low pressure area nga nakahawa na sa may bandang Malungon, Sarangani Province.
Segun ni Mr. Rene Punzalan, labaw sa PDRRMO Sarangani, ug Robert Lubonting, ang operations officer, ang LPA ang nakita sa may bandang Malungon, ug kagahapon sa hapon nagpaduol na kini sa Puerto Princesa sa Palawan.
Magbinantayon sa gihapon ang mga katawhan sa mga pagbaha ug landslide tungod kasamtangang nasinatian ang moderate to heavy rainfall gumikan sa maong LPA giubanan sa southwest monsoon o habagat.
Gipahimangnuan sa PDRRMO Sarangani nga dili usa magpalawod ang mga mananagat aron masiguro ang ilang kahimtang. Una ng nasinatian sa mga katawhan sa pipila ka barangay sa Alabel ang mga pagbaha sugod niagi pang mga semana, ug nasundan sa pipila ka lugar sa probinsya.
Samtang, sa pikas nga bahin, ni-arangkada na ang kasaulugan sa Buwan ng Kabataang Sarangan, subay sa balaod Republic Act No. 10742 o SK Reform Act nga matag bulan sa Agosto pahinungdan ang sektor sa kabatan-unan.
Matud pa ni Ms. Gretchin Boni, ang nangulo karon sa Sulong Kabataan program ni Governor Solon, nagpadangat na matud pa og mensahe sa pagdayig ang commissioner sa NYC kon National Youth Commission nga si NYC Commissioner Paul Anthony Pangilinan tungod sa nakahan-ay ug nindot nga mga programa nga giandam sa usa ka bulan nga selebrasyon samtang gatuman sa mga safety protocol sa gobyerno.
Pinaagi sa webinar gamit ang internet-teleconferencing, ma-experience sa mga kabataang Sarangan ang pinasahi nga mga aktibidad sa Buwan ng Kabataang Sarangan ilalum sa new normal setup, sa pakig-alayon sa buhatan ni PPSK President Board Member Rheymar Dian, pito (7) ka municipal SK president ug pito (7) usab ka municipal youth development officer, sa pagsuporta nila Senador Manny ug Congressman Ruel Pacquiao, Vice Governor Elmer De Peralta, tanang board member ug mga mayores, ug sa dakong pag-ayuda sa Sarangan youth champions, advocates and volunteers.
Adunay mahitabo nga Usapang Sarangan, ang mga topiko ang maghisgot sa papel sa mga kabataan kabahin sa pagpagkang sa maling impormasyon taliwala sa Coronavirus global outbreak; ang papel sa mga kabatan-unan sa pang-kalibutan nga kalihukan ilalum sa new normal; ug ang padayon nga pag-promotar sa pag-amping sa kinaiyahan bisan anaa pa sa community quarantine.
Gilauman sa mga organizer sa virtual talk sa Usapang Sarangan ang reigning Ms. Earth Philippines 2020 nga si Ms. Roxanne Baeyens taga-Baguio City. Apil usab nga muhatag sa iyang mga maayong pagtulun-an ang kapikas sa kinabuhi ni Governor Solon nga si Maam Michelle Lopez Solon.
Pakusgan pa sa selebrasyon ang fundraising campaign karon sa mga kabataan sa Sarangani Province aron matabangan nga matagaan og libreng portable AM-FM radio ang mga estudyante nga radyo ray maabot nga signal sa ilang gipuy-an sa kabukiran aron makapadayon sa ilang pag-eskwela bisan wala usay face-to-face nga pagklase. Gitawag kini nga Radyo para sa Baryo fundraising campaign.
(Source: Sarangani PIO)
