Cebu City – Pursigido ang DOTr o Department of Transportation nga ipadayon ang Bus Rapid Transit o BRT system sa Sugbo luyo sa awhag ni Sen. Nancy Binay nga irekonsiderar ang proyekto.
Nahinabisa media si Kalihim Arthur Tugade miingon nga ilang nakita nga kinahanglan gipadayon ang proyekto dili lang alang sa kaayohan sa mga Sugboanon kon dili hasta sa mga mulupyo sa ubang bahin sa Kabisay-an ug Mindanao.
Matod ni Tugade, padayon kini ug gani, ang unang bahin sa procurement sa phase 1 gitakda nang sugdan sa kataposan ning tuiga.
Sa nasayran, sa hearing sa Senado niadtong Biyernes sa proposed budget DOTr sa sunod tuig, si Binay miingon nga nakagasto na ang ahensiya og ₱ 7 bilyones sa nalangay nga Cebu BRT system apan bisan usa ka excavation wala pay nahimo sukad sugdi ang project niadtong 2015.
Nahibaw-an ni Binay nga ang proyekto, nga gigastohan sa ₱ 16.5-bilyon nga pautang sa World Bank, gitakdang malihok na sa Hunyo sunod tuig.
Apan gitataw ni Tugade nga ang ₱ 16 bilyon wala pa ma-release sa World Bank.
Aduna nay commitment sa pagbayad ug tubo apan wala pay natigayon nga loan. (Jhon Tadlip/JTY)
(Source: Department of Transportation)