Cagayan de Oro – Usa ka variety show contest nga gisalmotan sa mga recovering drug responders ang mitapos sa usa ka bulan nga kasaulogan sa Drug Abuse Prevention and Control (DAPC) 2023 Month nga gipasiugdahan sa City Anti-Drug Abuse Council (CADAC) pinangulohan ni Mayor Rolando `Klarex’ Uy.
Nahimong mananaog sa contest ang barangay Carmen. Lakip sa misalmot sa kalihukan ang mga recovering drug responders sa Community-Based Drug Rehabilitation Program (CBDRP) gikan gikan sa Barangay Agusan, Bugo, Bulua, Camaman-an ug Carmen.
Samtang, naangkon sa Brgy. Bulua ang ikaduhang dapit, ug ang ikatulong dapit nasakmit sa Brgy. Camaman-an.
Sa samang higayon, gideklarar nga grandslam winner sa Christmas Bazaar Booth Display ang CBDRP Carmen gikan sa 2017-2022.
Sa iyang mensahe isip representante ni Mayor Klarex, gidasig ni City Administrator Atty. Roy Hilario Raagas ang tanang stakeholders nga magtinabangay aron makab-ot ang kampanya ug tinguha sa syudad nga makab-ot ang ‘drug-free city’.
Matud niya nga dako ang epekto sa druga sa pamilya kun adunay miyembro nga malambigit sa gidili nga druga diin kinahanglan nga mahatagan og igo nga paningkamot aron dili malihis sa insaktong dalan ang mga kabatan-onan.
Samtang gipasalamatan usab ni CADAC co-chairman ug City Councilor Romeo Calizo si Mayor Klarex kinsa hugot nga misuporta sa programa, ingon man ang mga barangay nga aktibong nagpatuman sa CBDRP.
Naglaum si Kag. Calizo nga madugangan pa ang 23 nga mga drug-cleared barangay sa Cagayan de Oro.
News and photo courtesy of Cagayan de Oro City Information Office