Niadtong unang panagkita nila Governor Kaka Bag-ao ug CMC Resident Mine Engineer Arnilo Milaor ilang naghisgotan kung unsa ang mamahimong partnership sa Nickel Asia Corporation – Cagdianao Mining Corporation (NAC-CMC) alang sa probinsya sa Dinagat Islands. Sigon ni Gov. Kaka kay Engr. Milaor nga kinahanglan kini ug public transport system aron mapadali ang pagbiyahe sa mga katawhan sa ubang munisipyo ilabi na ang mga lagutmon ug presko nga isda nga kuha sa mga mag-uuma ug mangingisda.
Maong karong adlawa, sa Kalikasang Buhay Park sa Provincial Capitol, malampuson ang gipahigayong turnover ug blessing sa tulo (3) ka DinagatLink Provincial Buses gikan sa NAC-CMC ngadto sa Provincial Government.
Usa kini ka importante ug mahinungdanon nga programa alang sa padayon nga partnership aron masiguro ang kalambuan sa tibuok probinsya ug katawhan nga nakasentro sa mga values nga gitudlo pinaagi sa vision ug fundamentals of governance ilalom sa Administrasyon ni Gov. Kaka, ilabi na sa people’s participation ug empowerment, environmental conservation, ug ang promotion sa human rights ug dignity.
“Walang maliit, walang malayo, lahat mahalaga.” Mao kini ang mga pulong ang nakaimprenta sa kilid ug likod nga bahin sa 3 ka bus. Gikan kang Gov. Kaka ang maong pamulong nga buot pasabot, tanan importante alang kaniya ug unta makatagamtan sa maayong kinabuhi ang tanang Dinagatnon nga wala’y gipili bisan paman ug layo ka, aduna’y obligasyon ang gobyerno sa katawhan.
Kung atong mahinumduman, sukad pa niadtong Congresswoman pa si Gov. Kaka ug hangtod karon nga Governor na siya sa probinsya, usa sa iyang prayoridad ang maayong dalan nga karon napahimuslan na sa katawhan. Matud pa niya, kung aduna’y nindot nga dalan kinahanglan aduna’y mangagi nga mga sakyanan nga naa’y sakay nga mga tawo ug goods. Usa na nga sample niini ang mga bus nga gihatag sa NAC-CMC aron mapadali ang pagtabok sa mga katawhan sa laing bahin nga munisipyo ug dali na ma-transport ang ilang goods nga mga paninda, ilabi na sa mag-uuma ug mananagat nga daling makahatod sa ilang produkto ngadto sa merkado ug mahitungod niini, motaas pa ang ilang mga abot.
Nagpasalamat si Gov. Kaka kang Engr. Milaor inubanan sa tibuok NAC-CMC sa ilang partisipasyon sa pagpalambo sa Dinagat Islands. Naghatag usab siya ug pasidungog sa kumpanya mahitungod sa pagsemento ug pag-abri sa mga dalan nga sakop sa lungsod sa Cagdianao sa pakig-partner sa Provincial ug Municipal Government, lakip na niini ang pagtuman sa ilang gisaad nga maghatag ug buses nga mapahimuslan sa mga katawhan. Dili lang sa mga buses ug kadalanan, mapasalamaton si Gov. Kaka kalakip na niini ang pagpahigayon ug reforestation sa upat sa watershed sa naasoy nga munisipyo aron kini maprotektahan ug magamit.
Sa katapusang mensahe ni Gov. Kaka siya miingon: “I hope kini ang sinugdanan sa mas malambuong Dinagat Islands kay pareha ta ug tumong nga mahimong posible ang mga botang kung aduna’y pakig-partner alang sa kalambuan”.
Nag-award usab ug certificate of appreciation ang Provincial Government sa pagpanguna ni Gov. Kaka ngadto kang Martin Antonio G. Zamora (NAC President and CEO) ug sa Cagdianao Mining Corporation isip pagdayig sa padayon nga pakig-partner ug paghatag sa DinagatLink Provincial Buses nga ang labing makabenipisyo niini mao ang mga katawhan alang sa pagsiguro nga aduna’y kasakyan ug mobiyahe sa pito (7) ka lungsod sa probinsya.
Gisaksihan kini nila Vice Governor Nilo P. Demerey, Jr., Cagdianao Mayor Adolfo Longos, District 1 Board Members Lyn Dialde, Carlos Bua; District 2 Board Members Noli Abis, Reggivi Amor E. Alcaria, Errol Conrad dela Cruz; ug ex officio Board Members Absalon Colandog (Philippine Councilors League), Elmie Olaco (Liga ng mga Barangay), ug sa tibuok banay nga opisyal, Dinagat Vice Mayor Petnel Sombrado, heads of offices, pipila ka mga empleyado sa Kapitolyo, ug Rev. Father Joseph Cantilado isip mao’y nag-blessing sa mga bus.
(Source: Dinagat Islands Provincial Information Office Facebook page)