Cebu City- Gipaabot nga mahibalik na ang biyahe sa mga barko gikan sa mainland Cebu ngadto sa mga lungsod sa isla sa Camotes ug Bantayan kon mapaubos na sa GCQ o general community quarantine ang probinsiya ugma, Mayo 16.
Sumala pa ni Gob. Gwendolyn Garcia, ang transition sa GCQ gikan sa ECQ magtugot na sa public transportation basta nga ang mga operator ug drayber mosubay sa guidelines nga gilatid sa DOTr o Department of Transportation ug sa LGU o local government unit diin sila nag-operate.
Hinuon, gitataw ni Garcia nga ang pagpadayon sa biyahe sa kadagatan wala maglakip sa paingon sa ubang probinsiya sa rehiyon.
Pero kon magkasabot sila sa mga gobernador sa Bohol, Negros Oriental ug Siquijor, mahimo nang mobiyahe sa nahisgotang mga lalawigan.
Gitakdang makigtagbo si Garcia sa mga operator sa bus, mini-bus ug roll-on-roll-off o RoRo vessel para pagtuki sa guidelines sa pagpadayon sa ilang biyahe.
Alang sa land travel, ang LTFRB o Land Transportation Franchising and Regulatory Board miisyo na og guidelines sa pagpadayon sa operation sa mga pasaheroan.
Kini naglakip sa pagtibhang og katunga sa gidaghanon sa mga pasahero ug pagpasul-ob og face mask.
Matod ni Garcia, moisyo ang pobinsiya og passes niadtong makatuman sa guidelines sa LTFRB.