General Santos City – Daw mosunod gayud sa tunob sa iyang amahan sa natad sa politika ang batan-on ug rapper nga anak-lalaki ni kanhi 8-division world boxing champion ug kanhi Senador Manny Pacquiao nga si Michael Pacquiao.
Kini human ang 22 anyos nga batan-ong Pacquiao maoy gikatakdang mohulip sa naha-unang gi-anunsiyo nga kandidato pagka-City Councilor Shandee LLido Pestaño nga gipa-atras gumikan himoon kining City Administrator ilalum sa administrasyon ni Gensan City Mayor Lorelie Pacquiao hulip kang out-going City Administrator Atty. Franklin Gacal Jr. nga takdang mokandidato pagka-Konsehal ning dakbayan sa Gensan alang sa 2025 elections ilalum sa partidong PCM- People’s Champ Movement.
Matud ni Atty. Gacal, si Michael Pacquiao mao unya’y usa sa mga tingog sa kabatan-onan sa dakbayan sa City Council, hinungdang siya gayud ang gipili nga ihulip kang Shande Pestaño. Takdang moduso sa ilang Certificate of Candicacy (COC) ang grupong PCM sa umaabot nga Oktubre 5, adlawng Sabado sa buhatan sa COMELEC GENSAN.