Mangnamnama ni Mr. Juris Manabat, Acting Supervising Tourism Operations officer ti La Union a mapapigsa pay ti turismo iti La Union ken ti Ilocos Norte iti nairubwat nga ‘’im INLUv’’.
Segun kenkuana, babaen iti nasao a programa ket ad adda pay a magutigut dagiti residente ti Ilocos Norte ken La Union nga agbinnisita kadagiti dua a probinsia.
Inbatadna a kastoy pay laeng ti maar aramid gapu ta narigat ti agbiahe wenno agturong iti sabali a pagilian rason a masapul a papigsaen pay laeng iti domestic tourism malaksid a maam ammo pay dagiti sabsabali a probinsia ken pada nga Ilokano.
Nupay kasta, kasapulan pay laeng iti negative result ti RT- PCR test kas maysa pay laeng kadagiti nasken nga idatag iti panagturong ti maysa a lugar.
KUnana pay a nalaklaka laeng ti agbiahe no nabakunaanen ti maysa a tao kas maysa kadagiti requirements iti sadinno man a lugar wenno pagilian a panagturongan ken panangsurot kadagiti alagaden nga intuyang iti Ilocos Norte Tourism.
Indanon met ti Acting Supervising Tourism Operations Officer ti La Union ti panagyamanna ken ni Gob. Mathew Marcos Manotoc iti nabara a panangsarabo na kadakuada manipud iti nasao a probinsia ken panangsupurtana iti nasao a programa.
(Source: Provincial Government of Ilocos Norte)