Naawat a naminpinsan dagiti Sirib Young Leaders Scholar ti stipendda iti umuna a semestre iti school year 2022-2023.
Daytoy ti inpakaammo ni Ilocos Norte Youth Development Officer Mr. Willie Jake Sib-at.
Segun kenkuana, agdagup ti sangapulo ket lima ribu, innem a gasut ken limapulo a pisos ti naawat dagiti maseknan nga iskolar.
Imbatadna a maibilang ditoy dagiti agad-adal iti nadumaduma nga unibersidad ken kolehio kas iti Mariano Marcos State University, Divine Word College of Laoag, Northwestern University, Northern Christian College ken ti Data Center College of the Phil.
Inbunannagna nga umabot iti uppat a gasut innem a pulo ket walo dagiti SYLS iti daytoy nga school year.
Kunana a karaman ditoy dagiti nangabak iti Binibining Ilocos Norte iti daytoy a tawen kas maysa kadagiti premyoda iti panangabakda.
Innayonna a manamnama a maawat dagiti maseknan nga iskolar ti stipendda para iti maikadua a semestre iti masungad a bulan ti Marso, Abril wenno Mayo iti masungad a tawen 2023. (Cita Macalipis)
(Source: Provincial Government of Ilocos Norte)