Nakurkurang ngem sangapulo a milyon a pisos ti dagup dagiti maipaay a tulong kadagiti mannalon, mangngalap ken livestock raiser iti masungad nga aldaw ti Huebes, Disiembre 22, iti sangoanan ti conference hall ti Provincial Agriculture Office.
Daytoy ti naammoan manipud ken ni Mrs. Luz Ortal, mangidadaulo ti Sustainable Development Center wenno SDC.
Segun kenkuana, nakurkurang ngem walo a milyon a pisos ti dagup dagiti maipaay a tulong kadagiti mannalon a nakiddaw iti babaen ti Agri Ka Dito Hotline.
Imbatadna nga innem a gasut tallopulo ket pito dagiti mannalon a mabenipisiaran iti babaen ti nasao a programa. Inlawlawagna a karaman kadagiti maipaay kadakuada dagiti bin-i nga irik, bin-i a mais, soil conditioner (humus), “foliar fertilizer” ken pestisidio.
Inbunannagna a dagiti maipaay a suporta kadagiti mangngalap ket agdagup iti nasursuruok ngem maysa a milyon a pisos para iti 108 a mangngalap iti nadumaduma nga ili ditoy probinsia.
Kabayatanna, inpakaammo ni Provincial Veterinarian Dr. Loida Valenzuela a maigiddan a maipaayan ti tulong dagiti sanga gasut uppat a pulo a livestock raiser nga agdagup ti innem a gasut tallopulo ribu pito gasut a pisos (630,700).
Innayonna a karaman kadagiti maipaay ti sangaribu uppat a gasut a “free ranged chicken” ken pitopulo a sako ti chicken feeds nga agdagsen ti limapulo a kilo ti maysa a supot. (Ronald Domingo)
(Source: Provincial Agriculture Office)