Kiniddaw ti Sangguniang Panlalawigan (SP) wenno provincial board ti Ilocos Norte idi Lunes kadagiti 21 nga ili ken dua a siudad ti Ilocos Norte a mapapartak ti pannakaisayangkat ti SIM registration, partikular kadagiti nasulinek a lugar.
Inbatad ni provincial board member Giancarlo Angelo S. Crisostomo, chair ti committee on peace and order ken ti committee on transportation and communication, bayat ti panangiduronna iti Provincial Resolution No. 2023-02-107 a mangidawat kadagiti amin a lider ti lokal a gobierno a mapapartak ti pannakaipatungpal ti SIM Registration, ken tapno masigurado a matungpal ti April 26, 2023 a deadline.
Iti babaen ti linteg, amin nga agdama ken baro a subscribers ket masapul nga irehistroda ti SIM card-da agingga iti Abril 26 daytoy a tawen.
Kalpasan ti naipakaammo a deadline, mapalubosan ti Department of Information and Communications Technology (DICT) a mangpalawa iti panawen ti panagrehistro iti sabali pay a sangagasut ket dwa pulo nga aldaw.
Ti end-user a saan a mangtungpal kadagiti kasapulan para iti panagrehistro iti uneg ti naikeddeng a panawen ket agresulta iti automatiko a pannaka-deactivation ti SIM. Â (April Ioyce Gonzales)
(Source: Provincial Government of Ilocos Norte)