Naibunong aminen ti limapulo a milyon a pisos nga inpaay ni Sen. Imee Marcos para iti Tulong Panghanapbuhay sa mga Disadvantage/Displaced Workers program ti Department of Labor and Employment ditoy Ilocos Norte.
Segun ken ni Mrs. Anne Marie Lizette B. Atuan, manager ti Public Employment Service Office wenno PESO ti gobierno probinsial, umab-abot iti sangapulo ribu dagiti benepisiario iti nasao a programa karamanen dagiti nabenipisiaran iti duapulo a milyon a pisos nga immuna a naparuk-atan.
Imbatadna a karaman kadagiti nabenipisiaran iti naud-udi a naiparuk-at a tallopulo a milyon a pisos (30 M) dagiti benepisiario ti ili a Currimao, Paoay, Pinili, Badoc ken ti siudad ti Batac.
Naibunong ti nasao a tulong babaen iti programa ti DOLE a TUPAD iti covered court ti Mariano Marcos State University.
Inlawlawag ni Gob. Matthew Marcos Manotoc a nasursurok ngem pito a milyon a pisos ti naipaay para iti umab-abot iti sangaribu uppat a gasut a kakailian manipud kadagiti nadakamat nga ili.
Impalgakna a tunggal maysa a benepisiario ket immawat iti lima ribu a pisos. Mainaig iti daytoy, impadanon ni Gob. Marcos Manotoc ti napalaus a panagyamanna ken ni Sen. Marcos a saan a nakalipat kadagiti kakailian iti Ilocos Norte.
Kunana a nupay addan idiay senado ti inana ket agtultuloy ti panangpanpanunutna no kasano a maipaayan ti tulong dagiti kakailian.
Kabayatanna, inpakaammo ni Atuan a manamnama nga ad-adu pay a tulong ti ipaay ni Marcos para kadagiti kakailian ditoy probinsia iti babaen ti programa ti DOLE a TUPAD.
Innayonna a maiyur-uray laengen ti panangipaay dagiti LGU’s iti DTR dagiti benepisiario para iti pannakaipaay ti kompensasyon dagitoy iti panagtrabahoda iti babaen ti nasao a programa ti DOLE.
Author: Ronald Domingo
Source: PGIN
