Malungon, Sarangani Province—Padayon pa karon nga ginasuta sa Municipal Disaster Risk Reduction and Management Council-Malungon kung pila gyud ka pamilya ang apektado sa pagbaha sa Barangay Malandag, Malungon Sarangani Province nga natigayon kagahapong adlawa July 11, 2022.
Nasayran nga duha ka Purok sa maong Barangay ang apektado sa pagbaha nga gilangkuban sa Purok Mabuhay ug Purok Ilang-ilang.
Alas 5:00 ang takna sa hapon kagahapong adlawa dihang mibundak ang makusog nga ulan nga hinungdan sa pagbaha.
Ginayon nga gihikling ang mga residente sa duha ka purok nga anaa duol sa sapa ug temporaryong nagpabilin karon sa barangay Gym sa barangay Malandag, Malungon.
Gawas sa Malandag, apektado usab sa pagbaha ang Barangay Tampal apan wala may mga residenteng gihikling, aduna lay lugar nga gibaha mugna sa kusog nga pagbundak sa ulan.
Ginasuta usab kung pila ka kabalayan ang naguba ug uban pang damyos gumikan sa maong kalamidad.
Matud sa MDRRMC-Malungon sa karon nagpadayon pa ang gihimong assessment sa ilang team sa lugar aron nga masayran pila gyud ang damyos sa maong pagbaha ug pila ka mga residente ang apektado. Samtang gihatagan na usab ug inisyal nga ayuda ang mga residenteng gihikling. (MDRRMC-Malungon)