Ad-adda manen a naiyasideg dagiti mannalon ken mangngalap iti gobierno probinsial babaen ti “Agri Ka Dito Hotline.”
Inlawlawag ni Bise Gob. Cecilia Araneta Marcos a kaipapanan daytoy a maysa laeng a teks ket maipadanon dagiti maseknan ti ania man a kiddaw wenno arungaingda iti gobierno probinsial.
Daytoy ti kangrunaan a mensahena kabayatan ti pannakaipaay dagiti kiddaw dagiti kaunaan a nangipadanon kadagiti arungaingda iti gobierno probinsial iti babaen iti programa nga “Agri Ka Dito Hotline.”
Segun kenkuana, napanunotan daytoy da Gob. Matthew J. Marcos Manotoc kenni Atty. Pancho Jose, a Chief of Staff na ken agserserbi nga agriculture focal person ti probinsia.
Immun-una ngem iti daytoy, inpakaammo ni Engr. Maria Teresa Bacnat, Officer-In-charge ti Provincial Agriculture Office a karaman kadagiti “agri inputs” a naibunong dagiti bin-i a bukbukel, abono, humus, plastic crates, sprayer, insektisidio ken dadduma pay idinto nga adda met dagiti naited a kasapulan dagiti mangngalap a kas iti iket.
Kagiddan daytoy, adda dagiti grupo nga inpaayan ti Bureau of Fisheries and Aquatic Resources wenno BFAR ti vacuum sealer ken multifunction vacuum packaging machine.
Inbunannag ti bise gobernador a daytoy ti mangipamatmat a nakapatpateg dagiti mannalon ken mangngalap iti pagilian nangnangruna ket mismo a ni Pres. Ferdinand R. Marcos Jr. ti sekretario ti Departamento ti Agrikultura.
Mamati nga ipaay ti presidente ti pagilian ti naan-anay a pannakaasikaso iti kasapulan dagiti maseknan.
Innayonna a sigurado nga ad-adu pay a programa ti maipaay kadagiti mannalon ken mangngalap.
Kabayatanna, daytoy a pannakaipaay dagiti kaunaan a nakiddaw ti “Agri Ka Dito Hotline” ket inatendaran da Bokal Jonathan Torralba, a Chairman ti Committee on Agriculture ti Sanguniang Panlalawigan, pakairamanan dagiti miembro ti komite a da Bokal Saul Lazo ken Philippine Councilors League (PCL) Interim President Handy Lao. (Cita Macalipis)
(Source: Provincial Government of Ilocos Norte)