Umabot iti dua gasut tallopulo nga agtartaraken ti baboy ti naipaayan ti tulong iti maikapaten a bansada a panangipaay ti gobierno probinsial ti tulong kadagiti naapektaran ti African Swine Fever wenno ASF dagiti tarakenda a baboy itay kallabes a saan a nakaawat ti tulong manipud iti Phil. Crop Insurance Corp. wenno PCIC.
Segun ken ni Gob. Matthew Marcos Manotoc, dagiti benepisiario ket manipud iti Laoag City, Batac City, Banna, Solsona, San Nicolas, Paoay, Marcos ken Vintar. Inpakaammona nga umab-abot iti lima a milyon a pisos ti naipaay a tulong pinansial kadagiti nadakamat a benepisiario.
Inlawlawagna a kababaan a naawat ti maysa a benepisiario ket lima ribu a pisos ken sanga gasut a ribu ti kadakkelan, dipende iti kaadu dagiti naapektaran a taraken a baboy dagiti maseknan.
Inbunannag ti gobernador a malaksid iti tulong pinansial ket adda pay ti naipaay a bin-i a bukbukel ti High Value Crops wenno HVC kas iti balatong pakairamanan ti mausar nga abono manipud iti Sustainable Development Center wenno SDC ken adda pay ti naited a “food pack” kadagiti maseknan manipud iti Department of Social Welfare and Development.
Kabayatanna, inannugot ni Gob. Marcos Manotoc a dakkel nga adal ti inbati ti ASF. Kunana a kangrunaan ditoy ti pammalagip a masapul a mangala dagiti agtartaraken ti baboy ti insurance dagiti tarakenda.
Impalgakna nga inlungalongna ken ni Provincial Veterinarian Dr. Loida Valenzuela a ti gobierno probinsial ti mangi-insure kadagiti taraken dagiti maseknan gapu ta mamati a dadakkel ti magasto ti probinsia no dagitoy ti mangibaklay ti maipaay a tulong kadagiti agtartaraken ti baboy.
Innayonna a ti kapatgan para iti gobierno probinsial ket adda ti mapastrek dagiti kakailian. (Cita Macalipis)
(Source: Provincial Government of Ilocos Norte)