Itultuluy ti panangsuporta ti Gobierno Probinsial iti Ilocos Norte nga idauluan ni Gobernador Cecilia Araneta-Marcos, iti pannakaited ti financial assistance babaen iti Review and Examination Assistance Program (REAP) ken Civil Service Review and Examination Assistance Program ti probinsia. Php 4,000.00 ti naited iti tunggal licensure exam beneficiary ken Php 500.00 iti tunggal Civil Service examinee. Natulongan ti programa ti 260 nga examinees iti intero a probinsia manipud iti nadumaduma a benneg, pakairamanan ti engineering, criminology, education, medical technology, ken nursing. Babaen iti daytoy a programa, naipaayan ti suporta dagiti agtaud a propesyonal ken sumaruno a civil servants iti panagsagana da para kadagiti licensure ken civil service examinations. Daytoy nga inisyatiba ket mangipakita iti tuloy-tuloy a panangsuporta ti gobyerno probinsial kadagiti arapaap dagiti agtutubo nga Ilokano, babaen iti panangpapigsa ti abilidad da ken pananglukat kadagiti ad-adu a gundaway para iti balligi ken panagserbi iti publiko.
By:Niña Tabilos