Nagresponde a dagus dagiti kaalyado ken mangsupsuporta ken ni Gob. Matthew Marcos Manotoc iti panawaganna a pannakaikkat dagiti poster ken tarpaulin dagiti kandidato.
Mainaig iti daytoy, impadanon ti gobernador ti napalaus a panagyamanna kadagiti maseknan.
Inlawlawagna nga ammona a nabannog ti tunggal iti napalabas nga uppat a pulo ke lima nga aldaw a panagkampania rason nga annugutenna nga awan ti umdas a balikas a pangipeksana ti panagyamanna kadagiti maseknan.
Sinaludaran ti gobernador dagiti kakailian a nakikaysa a nangipamatmat iti panangipategda iti pannakasaluad ti aglawlaw babaen iti itutulongda a nagikkat kadagiti nasao a poster ken tarpaulin.
Mangnamnama ni Gob. Marcos Manotoc a marecycle dagiti nasao a poster ken tarpaulin ket saan nga agdiretso kadagiti pagbasuraan tapno ad-adda pay a makatulong ti tunggal maysa iti pannakasaluad ti aglawlaw.
Kabayatanna, naragsakan iti panangimatmat dagiti kakailian iti napintas a panagtitimpuyog.
Namnamaen ni Gob. Marcos nga agtultuloy daytoy a kinapintas ti panagtitimpuyog ditoy probinsia para ti al-alisto a panagrekobre wenno ibabangon ti Ilocos Norte manipud iti pandemia a ginubuay ti COVID-19. (Rod Sadian)
Â
(Source: Provincial Government of Ilocos Norte)