Nangipaay ti National Economic and Development Authority wenno NEDA ti grant nga agdagup ti 4.3 milion a pisos para iti maiyestablisar nga Micro, Small, Medium Enterprises (MSME) Incubation Center ti gobierno probinsial.
Daytoy ti siraragsak nga inpakaammo ni Gob. Matthew J. Marcos Manotoc kabayatan ti inyuswatna a press conference.
Mainaig iti daytoy, mamati ti gobernador a sakbay nga agngudo ti agdama a tawen 2022 ket maiyestablisaran ti nasao nga “incubation center” iti La Tabacalera.
Inlawlawagna a ti nasao a pasilidad ti mabalin a pagturongan dagiti babassit a negosiante ditoy probinsia nangnangruna kadagiti awanan ti computer, printer, scanner ken dadduma pay a kagamitan a masapulda iti al-alisto a pannakailako dagiti produktoda.
Malaksid iti daytoy, imbatad ni Gob. Marcos Manotoc a babaen iti nasao a pasilidad ket adda ti nakasagana a mangiwanwan kadagiti MSME’s nga agpangpangngadua kadagiti planoda a mangpasayaat iti produktoda wenno ania man a tulong a kasapulanda.
Innayonna a mabalin pay a mausar ti “incubation center” a pakaisayangkatan ti taripnong, seminar ken dadduma pay nga aktibidad wenno ganuat dagiti MSME’s ditoy probinsia.
Author: Irene Ringor, PGIN-CMO
Source: PGIN-CMO
