Batac: Naruay a lugar iti Ilocos Norte a nagpositibo ti ASF, nakasaganan a dumalan iti “Sentinel Program” ti DA

0
0

Inpakaammo ni Provincial Veterinarian, Dr. Loida Valenzuela, a saan pay a naan-anay nga “ASF free” ti Ilocos Norte.

Visit RPN DZRL Batac

Nupay kasta, inlawlawag na a nakasaganan dagiti lugar ditoy probinsia a nagpositibo ti ASF a dumalan iti “sentinel program” ti Departamento ti Agrikultura (DA) banag a nakaragsakan ni Gob. Matthew Marcos Manotoc.

Maiyur-uray ti isasangpet ditoy probinsia dagiti burias a maipan kadagiti lugar nga immuna a naaddaan ti kaso ti ASF.

Kunana nga agturong ti grupoda ita nga aldaw idiay ili a Burgos para iti panang-validateda iti “housing” wenno ubong a pakaipanan kadagiti “sentinel pig”.

Inlawlawagna nga adda ti nakitada iti bukod a lugar a paggapoan ti maited a burias.

Inbunannagna nga iti Pagudpud, a maibilang a “yellow zone”, ket nag-negatibo iti ASF dagiti nakolekta a “sample” pakairamanan ti ili a Pasuquin.

Mangnamnama ni Valenzuela a mamantener daytoy ken no awan la ketdi ti malabsing a gakat ti gobierno nasional iti babaen ti DA ken ti Bureau of Animal Industry ket mapasubli iti kabiitan a panawen ti pannakabigbig ti probinsia nga “ASF free”.

Segun kenkuana, ti kaudian nga ili a nakaawat iti ASF free clearance ket ti ili a Banna.

Nupay kasta, inlawlawagna a saanna a kaipapanan a mabalinen dagitoy ti agtaraken ti uray sadino ti paggapoanna gapu ta masapul a dumalan pay dagitoy ti “sentinel program”.

Innayonna a ti ili a Pinili ket dumaldalan pay laeng ti validation para iti pannakapagbalinna a “yellow zone idinto a ti Bangui ket kaaw-awat pay laeng ti DA Regional Field Office kadagiti naipatulod a dokumento. (Irene Ringor)

(Source: Provincial Government of Ilocos Norte – Communications & Media Office)

LEAVE A REPLY

Please enter your comment!
Please enter your name here