Impakaammo ni Mr. Patrick John Ratuita, presidente ti SIKA a ti nasao iti blood -letting ket maiyuswat iti Barangay Davila, Pasuquin, Ilocos Norte. Segun kenkuana, daytoy ket pannakipagpaset pay laeng ti gobierno probinsial iti liderato ni Gob. Mathew Marcos Manotoc iti World Blood Donor Day 2022.
Segun pay kenkuana, naituding met inton Hulyo 2 ti blood -letting activity iti Provincial Auditorium a kabinnulig da ti Ilocos Norte Youth Office ken ti Philippine National Red Cross.
Kunana a daytoy ket tinawen nga isaysayangkat ti SIKA wenno grupo dagiti agtutubo manipud kadagiti 21 nga ili ken dua a ciudad ditoy Ilocos Norte. Gapu iti daytoy, gutgutiguten ni Ratuita dagiti miembro ti SIKA ken dagiti kailian nga interesado a mangidonar iti dara iti pannakipartisipar da iti blood – letting activity.
Kunana a masapul nga agtawen iti 16 agpangato ken addaan ti napintas a kondision iti bagi.
Ti panangidonar iti dara ket dakkel ti maitulong na kadagiti makasapul ti dara a pangsilpo iti biag.
Dagiti maukkon iti bloodletting activity ket maipundo iti Sirib Youth Blood bank a nakasagana a pangalaan no adda dagiti insigida a makasapul. (Irene Ringor)
(Source: Provincial Government of Ilocos Norte)
