Indasar ni Architect Felino Palafox Jr. iti naisayangkat a “public consultation” ti Provincial Development and Physical Framework Plan ti Ilocos Norte dagiti kangrunaan a maitampok iti plano para iti probinsia.
Segun ken ni Engr. Pedro “Pete” Agcaoili Jr., Provincial Planning and Development Officer ti gobierno probinsial, naimbitaran dagiti kameng ti Provincial Development Council pakairamanan dagiti sumagmamano a maseknan a grupo.
Imbatadna a ti nasao a konsultasion ket inatendaran ni Gob. Matthew J. Marcos Manotoc.
Mainaig iti daytoy, impasingked ni Palafox a karaman ti digital infrastructure kadagiti smart cities.
Kunana a nadakamat pay ti architect ti pakaseknan ti manamnama a pannakaiyestablisar dagiti eco tourism projects ken napagsasaritaan pay ti plano a maipasdek a transport hub.
Inbunannag ni Agcaoili nga inlawlawag ni Palafox a saan laeng a ti siudad ti Laoag ti karaman iti nasao a plano para iti probinsia.
Segun kenkuana, impalgak ti architect nga adda ti naaramid a “clustering” kadagiti siudad ken munisipio a pakaipaimaan ti agrikultura, turismo, forestry ken dadduma pay.
Impatalged ti PPDO a dagitoy a lungalong ni Palafox ti mapaaprobaran kadagiti kameng ti PDC.
Kabayatanna, imbatad ni Agcaoili a ti kalikagum ni Gob. Marcos Manotoc a maipangpangruna ti pannakaiyestablisar ti “economic zone” ditoy probinsia.
Innayonna a nupay addan ti eco zone iti mall ti San Nicolas ken ti MMSU ti siudad ti Batac ket napinget ti kalikagum ti gobernador a mapagbalin nga economic zone iti “airport – Fort Ilocandia area”. (Irene Ringor)
(Source: Provincial Government of Ilocos Norte – Communications & Media Office)
