Iti panangikagumaan a mangsuporta ken tapno agtultuloy a masuportaran iti performance dagiti atleta, naituding ti gobierno ti Laoag City a mangiwaras iti running shoes kadagiti amin nga atleta a makisalip iti masungad a Region 1 Athletic Association (R1AA) Meet.
Ti pannakaiwaras ti running shoes, a naangay idi Mayo 3 iti gymnasium ti Ilocos Norte National High School, ket paset ti panagkumit ti gobierno ti siudad a mangitandudo iti kinalaing iti isports ken panangparegta kadagiti atletana nga ikagumaanda ti kinatan-ok.
Impaganetget ni Mayor Michael Marcos Keon, a naregta met a tumataray ken managayat iti isports, ti kinapateg ti panangipaay iti umno nga alikamen kadagiti atleta, nangruna dagiti mangibagi iti siudad kadagiti dadakkel a pasalip.
Agdagup iti 551 a high quality running shoes ti naituding a maiwaras kadagiti amin nga atleta, coaches, ken trainers iti Department of Education Schools Division iti ciudad ti Laoag.
Ti regional sports event a maangay iti San Carlos City, probinsia ti Pangasinan manipud Mayo 14 agingga inton Mayo 19, ket manamnama a makaawis ti ginasut nga atleta manipud iti nadumaduma a paset ti rehion.
Ti pannakaiwaras ti running shoes ket maysa laeng kadagiti adu a gannuat nga impatungpal ti gobierno ti siudad a mangsuporta kadagiti atletana. Nagpuonan ti siudad kadagiti sports facilities ken national trainers tapno mapadur-as ti paglaingan ken talento dagiti atleta.
Babaen ti pannakaiwaras ti running shoes, namnamaen ti gobierno ti siudad a maikkan dagiti atletana iti competitive edge ken mapasayaat ti tsansada a mangabak iti balitok iti R1AA.
Author: April Joyce Gozales
Source: LGU Laoag City