Ad adu manen dagiti agsangpet a lokal ken gangannaet a turista ditoy Ilocos Norte ita a bakasion babaen iti Laoag International Airport (LIA).
Daytoy ket kalpasan nga inaldawen nga adda ti schedule iti flights ti Phil. Airlines iti LIA manipud Lunes agingga iti Domingo nangrugi idi Marso 27 iti daytoy a tawen.
Maipalagip a personal a kiniddaw ni Gob. Mathew Marcos Manotoc iti management ti PAL a mapagbalin a pito iti flights ti PAL iti Laoag International Airport ti kada aldaw manipud iti lima laeng a flights ti kada lawas.
Daytoy a banag ket pinatgan met ti PAL a nakaragsakan ni Gob. Marcos Manotoc. Gagem daytoy ti gobernador ket ad adda a pangalistuan dagiti umay agbakasion ditoy Ilocos Norte ti aglugan iti eroplano ngem iti by land wenno lugan.
Mamati ti gobernador nga ita a bakasion ket adu manen dagiti agsangpet a bakasionista saan laeng a kadagiti kadaraan nga aggapu idiay ballasiw taaw ngem ket dagiti pay gangannaet nga umay mangpalabes iti semana santa ditoy probinsia.
Saan a linged a ti Ilocos Norte ket maysa kadagiti maipagtangsit a probinsia saan laeng nga iti intero a Pilipinas ngem ketdi iti intero a lubong gapu kadagiti napipintas nga awan kadagiti sabsabali a lugar malaksid a maibilang pay a natalged a pagpasyaran. (Rod Sadian)
(Source: Provincial Government of Ilocos Norte)