Manamnama a mairugi ita a bulan ti Enero ti nabayagen a padpadaanan dagiti agad-adal a “libreng sakay”.
Segun kenni Atty. Athena Nicolette “Nikki” A. Pilar, mangidadaulo ti Metro Ilocos Norte Council (MINC), karaman kadagiti mabenipisiaran iti daytoy a programa ket dagiti indigent student, senior citizen, masikog ken dagiti adda rangkap ti bagi na wenno PWD.
Inlawlawagna a tapno awan dagiti mapaboran nga agbalin a benepisiario ti nasao a programa ket nakikoordinar ti opisinada iti Provincial Social Welfare and Development Office ken dagitoy met ti nakikoordinar kadagiti City/Municipal Social Welfare and Development Office.
Impalgak ni Pilar nga aggapo ti listaan kadagiti siudad ken munisipio gapu ta dagitoy ti makaammo no asino dagiti napudpudno nga agkasapulan ti libre a plete.
Inbunannagna a mabunungan dagiti benepisiario ti stub babaen kenni Gob. Matthew J. Marcos Manotoc.
Kunana a tunggal maysa nga stub ket kaibatugan ti limapulo a pisos ken maikkan ti tunggal maysa a benepisiario ti sangapulo nga stub.
Imbatadna a dagiti partisipantes iti daytoy a programa ti gobierno probinsial ket dagiti pampasahero a jeepney pakairamanan dagiti modern jeepney nga akreditado iti MINC.
Kuna ni Pilar a pinagpirmada dagiti pampasahero a jeepney nga interesado a makibinnulig iti daytoy a programa ti probinsia iti Memorandum of Undertaking ken amin a nagparehistro a makipartisipar iti nasao a programa ket addanto ti maipaskil a “libreng sakay”.
Innayonna a tallo ribu dagiti benepisiario ken agdagup ti maysa punto lima a milion a pisos ti nailatang a pundo para iti nasao a programa. (Ronald Domingo)
(Source: Provincial Government of Ilocos Norte)