Agarup 500 nga umili, kaaduanna ket senior citizens ken ubbing, manipud iti daytoy a siudad ti nag-avail kadagiti libre a diagnostic tests ken agas babaen ti pammadayaw ti maysa a pribado a health retailer.
Napan idiay Ilocos Norte ti Watsons Alagang Pangkalusugan medical mission agraman dagiti health volunteers manipud iti probinsia tapno maipaayan dagiti umili iti libre a konsultasion dagiti doktor, agas, ken nadumaduma nga eksaminasion iti laboratory.
Maysa pay a mobile clinic ti SM Foundation ti nangipaay met kadagiti residente iti libre nga electrocardiogram ken chest x-ray test iti rekomendasion dagiti consulting physicians.
Kinuna ni Patrick Yu iti maysa nga interbiu , isuna ket maysa a marketing manager dagiti Watsons personal care stores, nga agtultuloy ti panagsapul ti kompaniada kadagiti wagas a mangpalawa kadagiti medikal a misionna.
Kas panangsuporta iti panggep ti gobierno a mangipaay iti accessible primary care facilities kadagiti amin a Pilipino, nagyaman ni Ilocos Norte Governor Matthew Manotoc iti SM Foundation ken Watsons gapu iti nabingbingay a panagkumitda a mangitandudo iti salun-at ken pagimbagan ti komunidad dagiti Ilocano.
Iti ababa a panagbitlana, impanamnama ni Manotoc kadagiti umili nga ar-aramiden ti gobierno ti amin a kabaelanna a mangpasayaat iti pannakagun-od iti de kalidad a pannakataripato ti salun-at babaen ti pannakitinnulong kadagiti nadumaduma a maseknan.
Author: Rod Sadian
Source: PGIN