Pannakapadur-as nga agpadpada iti benneg ti agrikultura iti nagbaetan ti Israel ken ti Ilocos Norte.
Daytoy ti maysa kadagiti kangrunaan a rinanta ni Israeli Ambassador to the Philippines Ilan Fluss iti pannakipagkitana kenni Gov. Matthew J. Marcos Manotoc iti kapitolio probinsial.
Segun kenkuana, mangkitkita da iti kadagiti pagkammayetan ti Ilocos Norte ken ti Israel iti sektor ti agrikultura ken iti panagpartuat. Inbatadna a mabalin met a makaited ti Israel iti “research and development” iti panangbigbig kadagiti baro a sakit dagiti mula babaen met iti tulong dagiti ilokano scientists a mangduktal iti sulosionna.
Kunana a babaen iti napintas a panagkammayet ken pannakausar pay dagiti kabarwanan a teknolohiya nga us-usaren da idiay Israel ket dakkel ti maitulongna iti pannakaiproseso dagiti nadumaduma a produkto dagiti mannalon.
Kabayatan na, naragsakan met ni Gob. Matthew J. Marcos Manotoc iti iyuumay Fluss iti Ilocos Norte gapu ta adu dagiti napipintas a nagsarsaritaan da a makatulong iti pannakapadur-as ti agrikultura, turismo, negosio , infrastacture ken dadduma pay a makatulong kadagiti Ilokano. (Cita Macalipis)
(Source: Provincial Government of Ilocos Norte)
