Di kumurang a 230 a hog raisers manipud iti probinsia ti Ilocos Norte a dati a natamaan iti African swine fever (ASF) ti nakaawat iti recovery aid babaen ti pammadayaw ti gobierno probinsial.
Pinasingkedan daytoy ni provincial veterinarian Loida Valenzuela idi Huebes, kunana a karaman kadagiti benepisiario dagiti saan a masakupan dagiti insurance packages manipud iti Philippine Crop Insurance Corporation.
Innayonna a daytoy itan ti maikapat a batch ti pannakaiwaras ti recovery aid kadagiti hog raiser.
Nakaawat dagiti hog raisers iti cash manipud PHP5,000 agingga PHP100,000 depende iti bilang dagiti baboy a naapektaran a dagiti dadduma ket nakagun-od met iti food packs ken vegetable seeds.
Malaksid iti hog repopulation program ti Department of Agriculture, nangilatang pay ti gobierno ti Ilocos Norte iti PHP5.3 million para iti recovery assistance.
Iti napalabas, mapattapatta a PHP2.5 milion ti nausar para iti pannakaibangon dagiti permanente ken temporario a pagkamangan para iti panagbakwit dagiti ayup, PHP2.5 milion para iti tulong iti pagbiag babaen ti pannakaipaay dagiti naandur nga ayup ken taraon, ken para iti tulong dagiti pagkamangan dagiti ayup babaen ti pannakaipaay iti feeds, agas, ken dadduma pay.
Kinuna pay ni Valenzuela nga iti agdama ket adda iti “yellow zone” ti probinsia, bayat a maur-uray ti opisial a deklarasion manipud iti DA nga ASF-free ti probinsia.
Kabayatanna, pinatibker ti gobierno probinsial ti ASF safeguardsbabaen ti panangiparitna iti pannakaibiahe dagiti sibibiag a baboy, karne ti baboy ken dadduma pay a naproseso a produkto a nakabase iti baboy nga awan ti umno a dokumento. (April Joyce Gonzales)
(Source: Provincial Government of Ilocos Norte)