Batac: Heritage Adventurer Cruise, sumanglad iti port of Currimao ita a tawen

0
3

Naurnos ti isasanglad ti kaunaan a cruise ship iti Port of Currimao ita a tawen 2023.

Segun kenni Atty. Athena Nicolette “Nikki” Pilar, mangidadaulo ti Metro Ilocos Norte Council (MINC) ti gobierno probinsial, umabot ti innem a pulo dagiti naglugan a pasahero ti Heritage Adventurer cruise.

Impalgakna a dagiti nakalugan a turista ket paspasig nga Amerikano idinto a ti cruise ship ket agop-operar ditoy Asia.  Nagpasiar dagiti turista kadagiti nadumaduma a lugar iti umabagatan a paset ti probinsia ken iti sumagmamano a paset ti Ilocos Sur.

Nupay kasta, imbatadna a nagpaut laeng dagitoy iti nagmalem ken kalpasanna ket intuloy dagitoy ti panagbiaheda.

Mangnamnama ni Pilar nga adda pay dagiti sumarsaruno ken daddadakkel a cruise ship a sumanglad ditoy probinsia.

Inbunannagna nga adda dagiti cruise ship a nangipakaammo nga interesado a sumanglad iti Port of Currimao.

Iti baet daytoy, kunana nga iti agdama ket awan pay dagiti naka-schedule a sumaruno a sumanglad a cruise ship ditoy probinsia. (Cita Macalipis)

(Source: Provincial Government of Ilocos Norte – Communications & Media Office)

Leave a Reply