Binigbig ni Gob. Matthew J. Marcos Manotoc ti Mariano Marcos State University a kas “standout university” saan laeng nga iti rehion uno ngem iti intero a lubong.
Daytoy ket bayat ti panagbalinna a kangrunaan a sangaili ken nagsarita iti Alumni Success Stories ti MMSU.
Iti baet daytoy, impalgakna nga ad-adu ken naranraniag pay a masakbayam ti unibersidad dagiti masirsirmatana a magun-od ti MMSU kadagiti sumarsaruno a tawen.
Mainaig iti daytoy, inpanamnamana ti agtultuloy a pannakikammayetna ken ti sibubukel a gobierno probinsial kenni Dr. Shirley Agrupis a president ti MMSU.
Impatalgedna a makikaysa ti unibersidad saan laeng nga iti gobierno probinsial ngem iti sibubukel a komunidad.
Mamati ni Gob. Marcos Manotoc a mahusgaran ti unibersidad iti agbalin nga epektona iti kagimongan.
Kabayatanna, inbunannagna a nupay saan pay unay a nabayag nga agnanaed iti probinsia ket ibilangna ti bagina a kas maysa a napudpudno nga Ilokano.
Inpanamnamana nga uray sadino pay ti pakadandanonanna ket ipanpannakkelnanto a kanayon a maysa daytoy nga Ilokano.
Kagiddan daytoy, ginutigotna dagiti agad-adal iti unibersidad a mangarakup iti kinatao dagitoy ken ti mangipatungpal kadagiti kabalinan nga aramiden a panagbalbaliw babaen kadagiti baro a teknolohia.
Kinarit ti gobernador dagiti agad-adal a mangsurot iti pagessemanda ken iti kalikagumda a pagbalinan.
Nupay kasta, ginutigotna dagitoy nga agsubli ditoy probinsia iti masangoanan tapno iburayda ti balligi a nagun-odda.
Innayonna nga agtultuloy ti pannakibinnulig ti gobierno probinsial iti MMSU nga ad-adda pay a mangpatibker iti panagsanay a namnamaenna a dakkel a makatulong iti ekonomia ti probinsia kangrunaanna iti agrikultura, turismo ken renewables. (Irene Ringor)
(Source: Provincial Government of Ilocos Norte)