Naisayangkat iti auditorium ti ili a Bacarra ti National Rice Technology Forum nga inwanwan dagiti mangidadaulo kadagiti maseknan nga ahensia pakairamanan ti Department of Agriculture Regional Field Office I iti panangidaulo ni Regional Director Nestor Dumenden, Rice Board, Philrice ken dadduma pay nga inatendaran ti nasursurok ngem dua gasut a mannalon manipud iti nadumaduma nga ili ken siudad ditoy probinsia.
Indauloan ni Gob. Matthew J. Marcos Manotoc ti gobierno probinsial a pakairamanan dagiti pannakabagi ti Provincial Agriculture Office iti panangidaulo ni Engr. Maria Teresa Bacnat kas Officer In-charge ken dagiti opisial ti ili a Bacarra iti panangidaulo ni Mayor Nicomedes de la Cruz.
Iti panangipaayna ti mensahena kadagiti mannalon, ginundawayan ti gobernador nga inpakaammo kadagiti mannalon nga addan ti hotline ti gobierno probinsial nga alisto a pangipadanonan dagiti mannalon ti kiddaw wenno arungaingda.
Impatalgedna a mabalin dagiti mannalon ken mangngalap ti agkiddaw kadagiti banbanag a kasapulanda.
Inlawlawagna a gapu iti kaadda dagiti damdamag nga adda dagiti mannalon a saanen a mangayat pay nga agmula gapu iti nababa a presio dagiti produktoda iti kataltalonan ken ti kangina dagiti usarenda nga agtalon.
Kunana a daytoy ti rason nga inkeddeng ti gobierno probinsial a dagitoy laengen ti mangipaay ti makinaria, kagamitan ken dagiti dadduma pay a kasapulan dagiti mannalon tapno agtultuloy ti panagmula dagiti mannalon ditoy probinsia.
Inbunannag ni Gob. Marcos Manotoc a nupay mainaig iti pagay ti kangrunaan a napagsasaritaan iti nasao nga aktibidad ket inulitna a ti kangrunaan a prayoridad ti probinsia iti benneg ti agrikultura ket ti panagbaliw iti “high value crops” gapu ta dandanin awan ti mapastrek dagiti mannalon iti irik.
Inannugot ti gobernador a dakkel a tulong ti naisayasangkat nga aktibidad iti ili a Bacarra a technology forum ken demonstrasion ngem nagtalinaed a dakkel a problema iti benneg ti ekonomia.
Mainaig iti daytoy, impadanonna ti napalaus a panagyamanna ken ni Usec. Kristine Evangelista iti DA a tumultulong iti pannakailako idiay Metro Manila kadagiti produkto ti probinsia.
Kunana a ti kapatgan kenkuana ket ti kaadda ti pakailakoan kadagiti produkto ti probinsia iti napintas a presyo.
Mainaig iti daytoy, ginutigot ni Gob. Marcos Manotoc dagiti mannalon a mangisentro ti imatangda kadagiti banbanag a mangsuporta kadagiti produkto nga addaan ti napintas a presyo ken sigurado a mailako.
Iti baet daytoy, impasiguradona a kas gobernador ket agtultuloy ti panangsuportana kadagiti mannalon ditoy probinsia. (Irene Ringor)
(Source: Provincial Government of Ilocos Norte)