Nangrugin a naipatungpal ti COVID-19 Recovery Assistance para kadagiti agtagikua kadagiti sari-sari store babaen iti Kadiwa Program ti gobierno probinsial.
Segun kenni Mrs. Elma Gabriel, mangidadaulo ti Micro Small and Medium Enterprise Office wenno SME Office ti gobierno probinsial, paset daytoy iti napinget a kalikagum ni Gob.
Matthew J. Marcos Manotoc a maiyalisto ti pannakaipaay ti tulong kadagiti maseknan.
Imbatadna a daytoy ket gapu ta makita ti gobernador a karaman dagiti agtagikua kadagiti sari-sari store kadagiti nakana a naapektaran ti pamastrekanda iti pandemia a ginubuay ti COVID-19.
Mainaig iti daytoy, dagiti sanga gasut sangapulo ket maysa a benepisiario ti ili a Bacarra ti immuna a nakaipaayan ti dua ribu a pisos ti balorna a “grocery items” a mailako kadagiti tianggi dagiti maseknan.
Simmaruno dagiti sanga gasut walopulo ket pito a benepisiario ti ili a Piddig idinto a sanga gasut innem a pulo ket uppat iti ili a Sarrat ken dua gasut limapulo ket tallo iti siudad ti Laoag.
Manamnama a maisaruno dagiti benepisiario kadagiti dadduma pay a Local Government Units ditoy probinsia kadagiti sumarsaruno nga aldaw nangnangruna ket siam a ribu nga agtagikua ti tianggi ti mabenipisiaran iti daytoy a bansada ti pannakaipaay ti tulong kadakuada.
Inpanamnama ni Gob. Marcos Manotoc nga agtultuloy ti panangipaay ti gobierno probinsial ti tulong kadagiti sari-sari store owners.
Inbunannagna a gapu iti kinangina ti presyo dagiti magatgatang ket masapul nga iti sumaruno a panangipaay ti probinsia ti tulong ket saan a nakurkurang ngem tallo ribu a pisos ti balor dagiti maipaay kadakuada a tulong.
Pakaseknan daytoy, napalaus ti yaman ken ragsak dagiti benepisiario iti awan sarday a panangkitkita ti gobernador no kasano a matulungan dagiti naapektaran ti pamastrekanda iti panawen ti pandemia a kas kadakuada a nga addaan iti sari-sari store.