Dinayaw ni Gob. Matthew Marcos Manotoc dagiti ar-aramiden ni Mayor Maximo Cajigal ti ili a Badoc.
Maibilang ditoy ti panangaramid ti mayor a pangopisinaan iti pagserkan ti munisipio ti Badoc.
Segun iti gobernador, paset daytoy iti kinapinget ti mayor a makapagserbi a naimbag kadagiti kakailianna kangrunaanna kadagiti makasapul iti serbisio.
Malaksid iti dayoty, impadanon ni Gob. Manotoc ti napalaus a panagyamanna ken ni Cajigal iti agtultuloy a panangipapaayna iti taraon dagiti agserserbi iti border ti probinsia iti abagatan a paset ti Ilocos Norte.
Impalgakna a sipud rimsua ti pandemia a gubuay ti COVID-19 agingga kadagitoy ket ti mayor ti Badoc ti mangibakbaklay iti taraon dagiti maseknan a kakailian.
Imbatadna nga awan a pulos ti nangngeganna a reklamo ti mayor iti ipapaayna a serbisio para iti probinsia.
Mainaig iti daytoy, inbunannag ti gobernador nga indiayana ken ni mayor cajigal nga ipadanonna laeng iti opisina no ania ti kasapulanna nangnangruna ket ti border ket saan laeng a ti ili a Badoc ngem ti Ilocos Norte.
Kunana a nagasat dagiti umili iti Badoc iti kaadda ti mayor da a kas ken ni Cajigal a sindadaan a mangaramid ti amin para iti pagimbagan dagiti kakailianna.
(Source: LGU Badoc, Ilocos Norte)