Mangrugin intono malem ken agpatingga intono Nobiembre sais ti maisayangkat a Food Strip kas paset iti Semana ti Ar-aria Festival.
Inpakaammo ni Mrs. Elma Gabriel, mangidadaulo ti Micro Small and Medium Enterprise Office (MSMEO) ti gobierno probinsial a walopulo ket walo dagiti MSME’s a makipaset iti nasao nga aktibidad.
Mainaig iti daytoy, imbatadna a paset daytoy iti napinget a kalikagum ni Gob. Matthew J. Marcos Manotoc a mangtulong kadagiti MSME’s ditoy probinsia a mangilako kadagiti produktoda.
Kuna ni Gabriel a mangrugi ti nasao nga aktibidad iti oras ti alas kuatro ti malem ken agpatingga iti alas nuebe ti rabii.
Inbunannagna a mangnamnama ti gobernador iti panangsappuyot dagiti kakailian kadagiti kabukbukudan a produkto.
Ti nasao nga aktibidad ket maiyusuat iti sango ti kapitolio probinsial karaman ditoy ti kalsada iti lauden ti Hypermarket ken iti dayaen ti Marcos Hall of Justice. (Irene Ringor)
(Source: Provincial Government of Ilocos Norte)
