Nangiyawid iti pammadayaw dagiti agad-adal iti Sarrat National High School (SNHS) a nangibagi iti pagilian iti World International Mathematics Olympiad idiay Bangkok, Thailand.
Mainaig iti daytoy, sinaludaran ni Gob. Matthew Marcos Manotoc dagiti nadakamat nga agad-adal pakairamanan dagiti coaches nangnangruna iti head coach a ni Mr. Michael Malvar ken ti school head a ni Dr. Marietta Yap.
Segun ken ni Dr. Dany Daquioag, special operations officer III ti provincial education office ti gobierno probinsial, nangiyalat dagiti nadakamat nga agad-adal ti dua a bronze medal ken tallo a merit awards.
Inpakaammona iti gobernador a dagiti nakagun-ud ti bronze medal ket da Charlie Quetula ken Caesar Respicio a nangibagi iti senior high school idinto a dagiti merit awardees ket da Jesrel Briones, Christian Malvar ken Ma. Cassandra Duque.
Gapu iti daytoy, impeksa ni Gob. Marcos Manotoc ti napalaus a ragsakna iti nagun-ud ti grupo a pammadayaw.
Impannakkelna a daytoy ket dakkel a pakaidayawan, saan laeng a ti nadakamat nga eskuela ken ti Ilocos Norte ngem ti intero a pagilian.
Naammoan a sangapulo ket lima a pagilian a buklen ti innem a gasut pitopulo ket innem a partisipantes dagiti nakipaset iti nasao a kompetisyon a pakairamanan ti Team Philippines nga inbagian dagiti agad-adal ti SNHS.
Immun-una ngem iti daytoy, inbunannag ti head coach ti nasao a team a dakkel ti naitulong ti gobernador iti daytoy a pannakaipaay kadakuada ti gundaway a nagturong idiay Thailand gapu ta daytoy ti kangrunaan a timmulong kadakuada a nangukkon ti kasapulan da a pundo. (Irene Ringor)
(Source: Provincial Government of Ilocos Norte)