Nangipatulod ti Department of Health Regional Office ti rehion uno ti kinarkarton a Ready to Use Supplementary Food wenno RUSF.
Naammoan a naiyawat dagitoy ken ni Provincial Nutrition Action Officer Mrs. Elma Irapta apaman a naisangpet ditoy probinsia iti immun-una a gundaway.
Immun-una ngem iti daytoy, inpakaammo ni Gob. Matthew Marcos Manotoc a kalikagumna a mapugipog ti malnutrisyon iti babaen ti administrasyonna.
Daytoy ket agsipud ta idi apagtugawna a gobernador ti probinsia ket kaaddoan ti Ilocos Norte ditoy rehion uno kadagiti “malnourished” nga ubbing.
Inlawlawag ni Irapta a ti RUSF ket “food supplement” a nairanta a maipaay a taraon dagiti malnourished nga ubbing manipud iti innem a bulan a maladaga agpangato iti uneg ti dua wenno tallo a bulan kas paset ti “nutritional program” ti departamento ti salun-at.
Ti nasao a produkto ket nairanta a diretso a kanen dagiti ubbing manipud iti paketena nga awan ti ania man a mailaok wenno saanen a kasapulan a maluto. (Ronald Domingo)
(Source: Provincial Government of Ilocos Norte)