Papigsaen ti Department of Education (DepEd) iti siudad ti Laoag ti network ken panagsilpona kadagiti mangitantandudo iti karbengan dagiti ubbing tapno masigurado a natalged ken awanan dagiti ubbing manipud iti aniaman a kita ti kinaranggas.
Kinuna ni DepEd Laoag Superintendent Vilma Eda idi Lunes nga agtultuloy ti saritaan iti City Social Welfare and Development Office (CSWDO), Laoag City Police Office (LCPO), ken nadumaduma non-government organizations ken advocacy groups tapno mapormula ti ad-adda a komprehensibo a wagas ti proteksion dagiti ubbing.
Impadamag ni Cherry Joy Garma, maysa a child protection policy focal person ti DepEd, nga adda di kumurang a lima nga ubbing a biktima ti bullying idi 2022 bayat a mabalin nga adda pay dadduma a kaso a saan pay a naipadamag gapu iti sumagmamano a rason.
Kas paset ti umuna a panagregget, kinuna ni Garma nga indagadag ti departamento ti pannakabukel ti child protection committee kadagiti amin nga eskuelaan tapno mapasayaat dagiti polisia ti panangsalaknib iti ubing.
Bigbigen pay ti DepEd ti kinapateg ti pannakairaman dagiti nagannak ken guardians kadagiti gannuatna a mangsalaknib iti ubing babaen ti panangisayangkatda kadagiti regular a kampania ti impormasion ken programa ti panagsanay tapno maipakaammo kadagiti polisia ti panangsalaknib iti ubing ken ti pannakaipatungpalda. Inkari ni Capt. Winnie Julian, child protection desk officer ti Laoag City Police Office, a suportaranna ti gannuat ti departamento a mangsalaknib kadagiti agad-adal ken manglapped iti aniaman a kita ti panangabuso iti pagadalan ken komunidad.
Kas maysa kadagiti 14 a child-friendly local government units (LGUs) ti probinsia ti Ilocos Norte, impanamnama ti gobierno ti siudad nga idauluan ni Mayor Michael Keon ti suportana tapno mataginayon dagiti nasayaat nga aramid ti panagbalin a child-friendly city. (Cheena Arzadon)
(Source: City of Batac LGU)