Nakurkurang ngem sangaribu a kakailian iti siudad ti Batac ti nangawat kadagiti sueldo dagitoy iti nasao a cash-for-work a programa ti gobierno probinsial para iti tawen 2021, iti kallabes a dua a nagsaruno nga aldaw.
Segun kenni Mr. Christopher Tapnio, mangidadaulo ti Environment and Natural Resources Office wenno ENRO, kaudian a Local Government Unit a naipaay aminen a sueldo dagiti benepisiario ket ti siudad ti Batac.
Imbatadna a kaudian ti nakurkurang ngem sangaribu a kakailian iti nadakamat a siudad ti nangawat kadagiti sueldo dagitoy iti nasao a programa ti gobierno probinsial para iti tawen 2021, iti kallabes a dua a nagsaruno nga aldaw.
Kaibatugan daytoy ti nasursurok ngem maysa a milyon a pisos ti sueldo dagiti maseknan a kakailian nga inpaay ti gobierno probinsial iti panangidaulo ni Gob. Matthew Marcos Manotoc.
Napalaus ti panagyaman dagiti kakailian iti awan sarday a panangpanpanunot ti gobernador no kasano a maalay-ayan ti rigat nga ibakbaklay ti tunggal maysa gapu iti pandemia a ginubuay ti COVID-19.
Inbunannag dagitoy a nupay bassit ti naawatda ket dakkel a pagyamananda agsipud ta dakkel a tulong daytoy kadakuada nangnangruna iti daytoy a pandemia.
Inapresiar dagitoy ti panagpadispensar ni Gob. Marcos Manotoc iti pannakaitantan ti pannakaipaay kadakuada ti sueldoda.
Impatalgedda a maawatanda ti palawag ti gobernador a masapul a masigurado a dagiti umawat ti sueldo ket dagiti nangipaay ti serbisio.
Impalgakda a nupay mabayag a maawat ti sueldo ket kalikagumda a gundawayan to manen ti nasao a programa ti probinsia.
Kabayatanna, ad-adda pay a naragsakan dagiti benepisiario kalpasan a naammoanda a kalikagum ni Gob. Marcos Manotoc a mapagbalin a tallo ribu a pisos ti kababaan a maipaay a sueldo ita a tawen iti babaen kadagiti nadumaduma a programa ti gobierno probinsial. (Irene Ringor)
(Source: Provincial Government of Ilocos Norte – Communications & Media Office)