Impakaammo ni Gobernador Mathew Marcos Manotoc a nangalan ti gobierno probinsial iti nayon a personnel nga agbantay kadagiti border ti Ilocos Norte tapno malapdan iti mabalin a pannakaiserrek ti African Swine Fever wenno ASF.
Segun iti gobernador, 24/7 ti panagbantay dagitoy kadagiti amin a border ti Ilocos Norte kas iti Badoc, Solsona-Apayao, Nueva Era ken iti Pagudpud.
Inlawalwagna a katulungan pay dagiti empleado ti probinsia dagiti kameng ti pulisya, DENR, City ken Municipal pakairamanan dagiti Barangay officials.
Dinakamat pay ti gobernador ti Integrated Checkpoint Against Criminality wenno ICAC a naikkan iti bileg a mangipatungpal ti naiget a panagbantay.
Kuna ti Gobernador nga epektibo met iti panagbantay dagitoy kadagiti borders gapu ta adda da met dagiti matiltiliwan kas iti ilia Badoc a naggandat a mangiserrek iti baboy.
Kiniddaw met ti gobernador iti naan anay a tulong ken kooperasion dagiti umili kagiddan ti panangpalagip na iti naiget a panagan annad tapno masigurado nga awanen iti sakit nga ASF a sakit ti baboy gapu ta grabe iti pinarnuay na kadagiti hog riasers ti naglabas a tawen. (Cita Macalipis)
(Source: Provincial Government of Ilocos Norte)