Naragsakan ni Gob. Matthew J. Marcos Manotoc iti kaaddan ti siyam a pulo ket siyam a porsiento a ditoy Ilocos Norte kadagupan ti lima gasut a ribu sanga gasut siyam a pulo ket innem a rumbeng a mabakunaan ti kontra COVID-19.
Basar iti datos a naipadanon iti gobernador, umaboten iti 495 627 wenno uppat a gasut siyam a pulo ket lima ribu innem a gasut duapulo ket pito ti “fully vaccinated” ditoy probinsia.
Imbatadna a daytoy ti nangitunda a nagtalinaed ti Ilocos Norte a kangatoan ti vaccination rate iti rehion uno.
Nupay kasta, inbunannag ni Gob. Marcos Manotoc nga agtultuloy ti panangitandudo ti gobierno probinsial iti “immunization program” babaen iti pannakaipangpangruna a mabakunaan dagiti mangmangged iti lokal nga industria, estudiante ken dagiti ubbing nga agtawen ti lima agingga iti sangapulo ket maysa.
Magutgutigot dagiti saan pay a nabakunaan pakairamanan dagiti “partially vaccinated” nga agpailista kadagiti “health office” iti bukodda a lugar tapno maituding ti pannakabakuna dagitoy. (Irene Ringor)
(Source: Provincial Government of Ilocos Norte – Communications & Media Office)