Pormal a nalukatan ken nabendisionan ti municipal isolation unit ti Marcos Ilocos Norte a masakaran ti Brgy. Lydia.
Indauluan daytoy ni Gob. Matthew Marcos Manotoc kas nagbalin a naisangsangayan a sangaili ken nagsarita ti nasao nga okasion.
Inatendaran pay daytoy ni Senior Provincial Board Medeldorf Gaoat, ilocos Norte PNP Provincial Director Christopher Abrajano, dagiti mamayor, covid ti consultant iti Dept. of Health empleado ti munisipio ken dadduma pay a bisita.
Immuna a nabendisionan ti pasdek babaen ken ni Rev. Victor Calma iti St. Anthony of Padua Parish sakbay a nakartib iti ribbon babaen met ken ni Gob. Matthew Marcos Manotoc.
Ti nasao a quarantine facility ket addaan iti 13 a kuarto ngem ti maysa ket usaren pay laeng dagiti fronliners.
Addaan daytoy iti saggaysa a comfort room, folding bed, electric fan, lamisaan, tugaw ken cabitnet a pagyanan iti alikamen dagiti quarantiners.
Libre daytoy a pagyanan ti kailian da a quarantiners ngem ti taraon da ket aggapu kadagiti kameng ti pamiliada.
Kuna ni Mayor Mariano a ti nabusbus a pundo iti pannakaipatakder ti COVID Center Facility ti Marcos ket manipud iti Bayanihan Fund nga 4 a milyon a pisos ken niniyunan da iti 2 a milyon a pisos mainipud iti 20% Development Fund ti munisipio.
Inlawlawag ni mayor a nupay awan pay iti kaso ti covid iti ili da, nagpaaramid da lattan ti bukkodda a quarantine facility a sindadaan a pagyanan dagiti kailian da a sumangpet manipud iti sabali a lugar wenno pagilian a pangpalabasan da ti 14 nga aldaw sakbay nga agawid da kadagiti bukodda a pagtaengan wenno pamilia. (Rosita Macalipis Cainggoy, RPN DZRL Batac Correspondent)
(Source: LGU Marcos, Ilocos Norte)
