Mipadayag sa ilang hingpit nga suporta ang mga punong barangay gikan sa 80 ka barangay ning syudad alayon sa pagpatuman sa “Bantay ASF sa Barangay (BAbay ASF) Program” nga gilusad niadtong Miyerkules, Mayo 26.
Ang paglusad sa programa gipangulohan nila ni Acting City Veterinarian Dr. Lucien Anthony Acac ug Dr. Julesben Maquiling, Veterinarian II sa Department of Agriculture (DA-10), uban ni Liga ng mga Barangay vice president Punong Barangay Marlo Tabac sa Barangay Gusa ug Liga ng mga Barangay president Konsehal Yan Lam Lim atol sa regular meeting sa maong Liga via zoom.
Gihimo usab ang signing sa Pledge of Commitment pinaagi ni PB Tabac, Dr. Maquiling, ug Dr. Acac.
Ang BAbay ASF usa ka programa batok sa African Swine Fever gamit ang community-based approach aron mapugngan ang pagkuyanap sa maong virus gamit ang rapid test kits uban sa kooperasyon sa mga local government units ilabina ang mga barangay government.
Tumong niini nga makatukod og epektibo nga ASF monitoring, surveillance, ug reporting system, paglig-on sa biosecurity measures sa farm level ug border control, hingusgan ang awareness campaign batok ASF, paglambigit sa LGU, pag-assist sa recovery ug repopulation sa mga naapektuhan sa ASF, ug pag-generate sa mga resources alang sa epektibo nga kampanya batok ASF.
Sa kasamtangan 34 na ka barangay ang naigo sa ASF ug 1,054 backyard hog raisers ang naapektuhan samtang mokabat P6.9 milyones nga pundo ang napagawas na sa syudad nga gihatag sa mga apektadong farmers isip indemnification cash assistance.
Nunot niini, gipasalamatan ni Dr. Acac ang mga PBs ilabina kang Konsehal Lim, PB Tabac ug sa tanang stakeholders sa pagpadayag sa ilang commitment ug pagsuporta sa maong programa ug naglaum sa hingpit ug hapsay nga pagpatuman. (ALR | City Information Office | City Veterinary Office)