Baao, Camarines Sur — Dai na ipupuli sa banwaan nin Baao an bangkay ni Sgt. Jack Perez Navarro na saro sa mga nagin biktima sa pagbagsak kan C130 Hercules cargo plane kan Phil. Air Force kan nagtalikod na petsa 4 kan bulan na presente.
Iyo ini an kinompirmar ni PB Manuel Catapang kan Brgy. Iyagan, Baao, CamSur kun sain naka-istar an pamilya kan suldados matapos na mag-desisyon an agom kaini asin mga magurang na sa Manila na sana ilubong an bangkay ni Sgt. Navarro kun sain igua naman nin harong an juven na suldados mientras na pinaghahalat pa an pag-abot kan saiyang bangkay.
Si Navarro iyo an load master kan eroplano kun sain ihahatod an mga bagong gradwar na pag-iriba sa probinsya kan sulo kan mangyari an madugong trahedya.
Nagadan sa nasabing plane crash an 49 mga suldados asin tulong nadamay na sibilyan.
Mientras tanto, inaprobaran naman an sarong resolusyon nin pakikidumamay kan Sangguniang Bayan kan Baao tanganing taw’anan nin honra asin komendasyon si Sgt. Jack Perez Navarro kan Phil. Air Force.
Sa regular na session kan sanggunian na pinamamayuhan ni VM Jose Malazarte, tama na bistuhon an heroism ni Sgt. Navarro na ibinuwis an sadiring buhay sa nasyon.
(Melvin F. Barayoga, RPN DZKI Iriga OIC)