Pormal na nga miduso sa ilang kandidatura ang tibook bando sa Aggrupation of Parties for Prosperity (APP) ug Hugpong ng Pagbabago (HNP) sa buhatan sa Comelec Dapitan karong adlawa October 1, 2021.
Pinanguluhan kini ni kanhi Kongresista Bullet Jalosjos nga magpapili pagka-Mayor uban sa iyang Bise Mayor Al Sy nga kanhi anaa sa pikas bando apan nipasilong na kini sa administrasyon. Lakip usab sa miduso sa ilang kandidatura ang upat ka mga incumbent city councilors nga sila si Bing Balisado, Pareng Hope Jarapan, Divine Patilano ug Angel Carreon ug ang mga bag-ong magpapili nga sila si Joseph Ryan Agolong, Atty. Claver Pajaren ug Mitzie Adriatico-Dulawan.
Sa kabahin ni Bullet Jalosjos iyang katuyuan sa pagdagan sa maong posisyon mao ang pagpadayon sa mga legasiya ni Mayor Rosalina “Nene” Jalosjos nga maghatud ug tinud-anay nga serbisyo sa tanang Dapitanon ilabi na nga anaa pa kita sa pandemya.
Lakip sa damgo ni Bullet ang pagpabarog sa multi-million project nga Mega Market and Transportation Hub nga anaa sa barangay Polo ipahimutang nga karong tuiga hingpit na kining masugdan ug makahatag unya kini ug dugang abot sa panudlanan sa syudad.
Gitinguha usab ni Bullet ang dugang pagpalambo pa sa natad sa turismo aron iyang matabangan ang mga dagko ug gagmay nga magpapatigayon nga maoy maka benepisyo sa maong kalambuan sanglit nahasentro ang syudad sa Dapitan nga bisitahon sa mga lokal ug langyaw nga mga turista.
Sanglit naila na si Mayor Nene karon nga “Nanay Ayuda” ipadayon usab ni Bullet ang Serbisyo Bilis sa Barangay nga karon nagpadayon ang serbisyo sa 50 ka barangay sa Dapitan nga walay pagpili ug bulok sa politika.
(News and photo courtesy of CITY INFORMATION DIVISION-CID-Dapitan Facebook page)