Good news gikan kang Malapatan Mayor Jun Sumbo tungod abrihan na matud pa ang bag-ong ruta sa dalan mahulog nga “sidecut” nga mag-konekta sa tulo (3) ka barangay ang Daan Suyan, Kinam ug Upper Suyan sa Malapatan, Sarangani Province.
Matud pa ni Mayor Sumbo, sa pagtinabangay sa Provincial Government sa Sarangani sa pagpanguna ni Governor Steve Chiongbian Solon kauban sila Senador Manny ug Congressman Ruel Pacquiao, Vice Governor Elmer De Peralta ug mga board member, ug sa 512th Engineering Construction Battalion naka-basi sa Bawing, Gensan, ablihan na ang kalsada “road opening” karong semanaha nga maoy gilantaw sa mga opisyales ug residente nga luwas kaagian tungod dili na maglisod sa pagtabok og dise-syete (17) kabuok nagsangang sapa hilabi na ang padulong sa Kinam ug Upper Suyan.
Segun ni Assistant Provincial Administrator for Operation Engineer Gerald Faciol, nakapahigayon na sila og reconnaissance survey kaabag ang Malapatan Municipal Engineering Office, ug ilang nakita nga maayong buhatan og bag-ong kalsada ang ibabaw nga bahin sa suba may gitas-on kini nga otso (8) kilometros.
Anaa na sila karon sa Phase 3 sa padayong pagpasemento sa provincial road gikan sa Lun Padidu paingon sa Daan Suyan, ug mahimong tuloy-tuloy na matud pa ang pagpasemento kung mahan-ay na ang bag-ong ruta sa dalan padulong sa Kinam ug Upper Suyan, pabor kini sa mga lumulupyo kasagaran mga kaigsoonang lumad.
Pangunahan sa 512th Engineer Construction Battalion ang pag-abri sa maong bag-ong ruta. Atong adlaw nga Miyerkules, Marso 4, nipirma og kasabutan ang Kapitolyo sa Sarangani pinaagi sa representante ni Governor Solon nga si Board Member Joseph Calanao, ang chairman sa SP Committee on Appropriation, tali nila Mayor Sumbo ug Lt. Col. Patricio Alejaga, ang commanding officer sa 512th Engineering Battalion, katugbang ang 73rd IB Philippine Army, alang sa maong road opening.