Hulagway gikan sa DavSur PIO. Atol sa unang adlaw nga paglingkod ni Gobernador Marc Cagas sa provincial capitol sa Davao del Sur.
Pormal ng milingkod kon nagsugod isip bag-ong gobernador sa Davao del Sur si Marc Cagas ang kanhi bise-gobernador sa probinsya.
Ang batan-ong Cagas ang mihulip sa iyang amahan nga si kanhi Gobernador Douglas Cagas kinsa namatay sa komplikasyon sa COVID-19 niadtong Hunyo 10.
Atol sa iyang unang adlaw, Lunes (Hunyo 28) sa iyang pagbalik sa trabaho human nga nipailawom kini sa quarantine, nagpatawag kini og meeting sa mga piniling department heads aron sa pagtuki sa mga problema ug proyekto sa probinsya.
Ang problema sa COVID-19 pandemic ang unang giatubang ni Governor Marc Cagas sa iyang unang adlaw sa pagreport sa kapitolyo isip bag-ong gobernador sa Davao del Sur.
Usa sa gustong buhaton sa bag-ong gobernador mao ang pagpatukod og dugang COVID wards sulod sa compound sa Davao del Sur Provincial Hospital (DSPH), dugang COVID isolation facilities ug pagmuntar og dormitory alang sa mga medical frontliners.
Buot usa nga ipaayo sa gobernador ang DSPH ug Gregorio Matas District Hospital (GMDH), pagpaayo sa pipila ka mga depektibo nga ekipo sa DSPH, pagpalit og dugang ambulance o patient transport vehicle ug paggahin og dugang pondo alang sa libreng pagkaon sa mga medical frontliners.
Laraw usab sa gobernador nga pangitaan og pamaagi nga mas daghan pa ang ma swab test ug mas mapadali ang paggula sa resulta ug gitutukan usab niini ang pagpadali sa pagpamalit og bakuna batok COVID-19, ug uban pa.
Gimanduan usab ni Governor Cagas ang mga department heads nga maghimo og safety measures sama sa pagbutang og acrylic o plastic sa matag lamesa sa opisina alang sa seguridad sa mga empleyado ug mga kliyente.
(Source: News Fort.ph)